مواضيع عامة

٤ طرق سهلة لتقليل وقت انتظار المرضى

غرفة انتظار بعيادة طبيب

المريض بيقضي جزء كبير من وقته في انتظار دوره في الكشف وتعتبر عملية الانتظار اكتر جزء مُرهق في زيارة الطبيب.غرفة الانتظار هي المكان المنطقي اللي نبدأ بيه وهو مكان مهم. الطب معقد، وعلشان كده المرضى يلجأوا إلى تقييم الرعاية الصحية من خلال اللي يفهموه و يحسوه. و ده يتمثل في مدى الترحاب اللي بيحسوه في المكان وتعامل موظف الاستقبال أو بشكل أساسي الميزات الي هيلاقيها في غرفة الانتظار.

عندنا طريقتين نحافظ بيهم على وقت المرضى: أولا، عن طريق تقليل الوقت الفعلي ال بيقضيه المريض في غرفة الانتظار، وثانيا، عن طريق الحد من الوقت المدرك – الوقت المحسوس – ال بيقضوه في الغرفة دي. النقطة الأخيرة ممكن تبان سخيفة أو مالهاش صلة بالموضوع بس الحقيقة غير كده. إن وقت الانتظار المتصور يؤثر على رضا المرضى حتى أكثر من وقت الانتظار الفعلي.  2008 Cornell University study .

اقرأ أيضاً: أفضل ١٢ طريقة تجذب بيها مرضى أكتر لعيادتك

بعض الافكار لتقليل وقت انتظار المريض /  تقليل شعوره بوقت الانتظار

١- إضافة عناصر مهدئة والقضاء على العناصر المجهدة والمزعجة

القلق بيخلي اوقات الانتظار تبان أطول. إدراك المريض لجودة الرعاية والشعور بالاهتمام واحتمالية ترشيح المكان للآخرين بيكون أكبر في الأماكن الأكثر جاذبية مقارنة بالمستويات الأقل جاذبية.

بعض النقط البسيطة لتحسين شكل غرفة الانتظار:

١.١- تطوير وتنويع مصادر القراءة:

عرض كتب متنوعة  طبية أو عن الاهتمام بالصحة العامة أو الانظمة الغذائية والرياضة أو الأطفال والتربية أو كتب تحفيزية عن تطوير الذات وكتب معلومات عامة علشان الناس فعلا تشغل وقتها وتتعلم حاجة جديدة.

الكتيبات والإعلانات الصيدلانية يفضل تكون موجودة في ستاند واحد في غرفة الانتظار.

١.٢- التنظيف خلال اليوم:

لو في أكواب مش نضيفة على الطاولة أو قمامة في المكان ده هيقلل من تقييم المكان مهما كان الطبيب ممتاز.

١.٣- الطبيعة والتهوية:

لو في مرونة في المكان، يفضل أن يكون في نوافذ في غرفة الانتظار. أي لمحة بسيطة للطبيعة زي حركة الهواء على الأشجار كفيلة بتخفيف التوتر والقلق. وممكن نضيف لوحات لمناظر طبيعية ووضع نباتات في المكان أو أحواض أسماك. النظر للأشياء الجميلة بيوفر شعور بالراحة للمرضى. والحفاظ على تهوية المكان و ان درجة الحرارة تكون معتدلة بحيث انه المريض لا يشعر بالحر أو البرد.

١.٤- التلفزيون أو الموسيقى في المكان:

يفضل تشغيل قناه مش إخبارية ولا بتذيع حاجة تثير الأعصاب. كمان الصوت يكون معتدل بحيث انه لا يسبب إزعاج للمرضى و الموسيقى يفضل تكون كلاسيكية هادئة علشان تساعد المريض في الاسترخاء قبل الكشف.

٢- التنويع في المقاعد

نجمع بعض الكراسي مع بعض علشان العائلات تحس بالخصوصية والراحة. ولو في تليفزيون، نسيب جزء من الكراسي حوله. نحاول نسيب مسافات بين الكراسي في مكان تاني للناس اللي بتحب الخصوصية ولو في طاولة، نحط جزء من الكراسي حولها.

يفضل وضع كراسي ليها ذراعين للمرضى الأكبر سنا علشان يكون سهل عليهم يقوموا ويسندوا عليها.

٣- الوضوح مع المريض في المواعيد

معظم الناس هيحسوا بإحباط وضيق أقل لو كانوا عارفين وقت الانتظار قد ايه مسبقا واكتر حاجة بتسبب الغضب هي أن المريض ما يبقاش عارف قدامه كام حالة.  لما الناس تبقى على قدر من المعرفة والدراية هيبقوا متعاونين ومتفهمين جدا.

المريض هيقدر جدا ويحترم لو العيادة عرفته بأي تغيير في ميعاده، حتى لو كان خلاص نزل من البيت/الشغل، لأن على الأقل المريض مش هيبقى مستعجل في الوصول للعيادة.  بكده الجو العام في العيادة هيكون أهدى وده هيساعد الطبيب على تقديم خدمة أفضل وبدون أي ضغوط.

٤- التسهيل على المرضى لإنجاز مهامهم

المرضى هينتظروا بصبر لحوالي 20 دقيقة، بس بعد كده هيبدأوا يحسوا ان وقتهم بيضيع.

علشان نقلل من احساس ضياع الوقت، نحاول نخلى غرفة الانتظار مكان يقدروا يستفيدوا منه ويكون work-friendly.

لو نقدر نوفر طاولة في مكان مش زحمة (طرف/أخر غرفة الانتظار) ده هيشجع المرضى انهم يذاكروا أو يخلصوا شغل وبالتالي ما يحسوش بوقت الانتظار ويفضل توفير مصادر كهرباء علشان يقدروا يشحنوا اجهزتهم.

في النهاية، احترام الوقت شئ مهم جدا في كل أمور الحياة و بالأخص مع المرضى وبالتالي لازم نقلل من الوقت اللي بينتظر فيه المريض دوره أو على الأقل نقلل احساسه بالوقت ده

  • عرض كتب مفيدة ومجلات جديدة تشغل وقت المريض بقرائتها.
  • غرفة الانتظار لما تكون مريحة هتقلل من إحساس المريض بالوقت.
  • الاهتمام بنظافة المكان.
  • وجود النوافذ والتهوية الجيدة ودرجة الحرارة المعتدلة من العوامل المهمة جدا.
  • صوت التلفزيون أو الموسيقى يكون مسموع بس هادئ علشان ما يزعجش المريض.
  • نوع الكراسي وطريقة وضعها في المكان وتوفير كراسي بذراعين للمرضى كبار السن عامل مهم.
  • احترام وقت المريض وتبليغه في حالة تأجيل أو إلغاء ميعاده قبلها بوقت كافي.
  • نخلي غرفة الانتظار work-friendly علشان المرضى يقدروا يستغلوا وقتهم وتوفير مصادر كهرباء.

كلها نقط سهلة وبسيطة هتساعدك تقدم الخدمة بتاعتك بسهولة وانت والمريض تكونوا في حالة من الرضا.